2026-ம் ஆண்டிற்கான மத்திய பட்ஜெட் நெருங்கி வரும் வேளையில், இந்திய ஹோட்டல் துறையினர் மத்திய அரசுக்கு முக்கியமான கோரிக்கைகளை முன்வைத்துள்ளனர்.
தற்போதைய சவால்கள்
உள்நாட்டுத் தேவை அதிகரித்துள்ள போதிலும், புதிய ஹோட்டல்களுக்கு நிலம் வாங்குதல் மற்றும் ஒழுங்குமுறை சிக்கல்கள் பெரும் சவாலாக இருப்பதாகத் தெரிகிறது. ஒரு ஹோட்டல் கட்டி முடிக்க 5 முதல் 8 ஆண்டுகள் வரை ஆவதும் பெரும் சிக்கலை தருகிறது. இதற்கிடையில், 2026 நிதியாண்டில் பிரீமியம் ஹோட்டல்களின் விகிதம் 72-74% ஆக இருக்கும் என ICRA ஆய்வு நிறுவனம் கணித்துள்ளது.
‘கட்டமைப்பு அந்தஸ்து’ (Infrastructure Status) ஏன் அவசியம்?
ரேடிசன் ஹோட்டல் குழுமத்தின் (Radisson Hotel Group) தெற்காசிய நிர்வாக இயக்குநர் நிகில் சர்மா, இந்தியாவின் மொத்த உள்நாட்டு உற்பத்தியில் (GDP) இத்துறை 7-8% பங்களிப்பதாகக் கூறினார். “ஆன்மீகச் சுற்றுலா, திருமணங்கள் மற்றும் மருத்துவச் சுற்றுலா என வளர்ச்சி அதிகரித்து வரும் நிலையில், ஹோட்டல் துறையை ‘உற்பத்தி சார்ந்த பொருளாதாரக் கட்டமைப்பாக’ அங்கீகரிக்க வேண்டும்” என அவர் வலியுறுத்தினார்.
சலெட் ஹோட்டல்ஸ் (Chalet Hotels) நிர்வாக இயக்குநர் ஸ்வேதாங்க் சிங், ஹோட்டல் துறை தற்போது 46.5 மில்லியன் வேலைவாய்ப்புகளை உருவாக்கியுள்ளது என்றும், 2035-க்குள் இது 64 மில்லியனாக உயரும் என்றும் கூறினார். இருப்பினும், இன்னும் இதற்கு ‘கட்டமைப்பு அந்தஸ்து’ வழங்கப்படாதது வளர்ச்சியைத் தடுப்பதாக அவர் வேதனை தெரிவித்தார்.
நிதி மற்றும் வரிச் சலுகைகள்
நூர்மஹால் குழுமத்தின் (Noormahal Group) தலைவர் கர்னல் மன்பீர் சவுத்ரி, இந்த அந்தஸ்து கிடைத்தால் குறைந்த வட்டியில் கடன் பெற முடியும் என்றும், இது புதிய கிளைகளை விரைவாகத் தொடங்க உதவும் என்றும் கூறினார். அக்காரர் இந்தியா (Accor India) நிறுவனத்தின் துணைத் தலைவர் ரீமா திவான், ₹10 கோடிக்கும் அதிகமான முதலீடு கொண்ட ஹோட்டல்கள் மற்றும் மாநாட்டு மையங்களுக்கு இந்த அந்தஸ்தை நீட்டிக்கக் கோரியுள்ளார்.
ஹோட்டல் துறையின் பிற முக்கிய கோரிக்கைகள்
GST சீரமைப்பு: ஜிஎஸ்டி விகிதங்களைச் சீரமைக்கவும், பசுமை ஹோட்டல்களுக்குச் சலுகை வழங்கவும் கோரிக்கை.
பொதுப் பட்டியல் (Concurrent List): சுற்றுலாத் துறையை மத்திய-மாநில அரசுகள் இணைந்து நிர்வகிக்கும் ‘பொதுப் பட்டியலில்’ சேர்க்க வேண்டும்.
ஆன்லைன் டிராவல் ஏஜென்சிகள்: ஆன்லைன் ஏஜென்சிகளுக்கு மாநில வாரியான GST பதிவுக்குப் பதிலாக, மத்திய அளவில் ஒரே பதிவை அனுமதிக்க வேண்டும்.
சிறிய நகரங்களில் ஹோட்டல் தொடங்குவதை ஊக்குவிக்க தனிச்சலுகைகள் வழங்கப்பட வேண்டும், உள்ளிட்ட கோரிக்கைகளை ஹோட்டல் துறையினர் எதிர்பார்க்கின்றனர்.
