இந்தியாவின் முன்னணி இ-காமர்ஸ் நிறுவனமான ஃபிளிப்கார்ட் (Flipkart), ஆன்லைன் வர்த்தகத்தைத் தாண்டி தற்போது அடுத்த கட்டத்திற்கு நகரத் தொடங்கியுள்ளது. வால்மார்ட் நிறுவனத்திற்குச் சொந்தமான ஃபிளிப்கார்ட், விரைவில் உணவு விநியோக (Food Delivery) சந்தையில் கால்பதிக்கப் போவதாகத் தகவல்கள் வெளியாகியுள்ளன. இது இந்திய ஸ்டார்ட்அப் உலகில் பெரும் பரபரப்பை ஏற்படுத்தியுள்ளது.
ஏன் இந்தத் திடீர் மாற்றம்?
ஃபிளிப்கார்ட் நிறுவனம் அடுத்த ஒரு ஆண்டுக்குள் தனது பங்குகளைப் பொதுச் சந்தையில் வெளியிட (Initial Public Offering – IPO) திட்டமிட்டுள்ளது. ஒரு நிறுவனம் ஐபிஓ செல்வதற்கு முன்னதாக, அதன் வருமான ஆதாரங்களைப் பன்முகப்படுத்துவது (Diversification) முதலீட்டாளர்களின் நம்பிக்கையை அதிகரிக்கும்.
தற்போது இந்தியாவின் உணவு விநியோகச் சந்தையில் Zomato மற்றும் Swiggy ஆகிய இரு நிறுவனங்கள் மட்டுமே கிட்டத்தட்ட 90% ஆதிக்கத்தைச் செலுத்தி வருகின்றன. இதை உடைத்து, லாபகரமான இத்துறையில் ஒரு பங்கைப் பெறுவதே ஃபிளிப்கார்ட்டின் நோக்கம்.
பெங்களூருவில் தொடங்கும் ‘பைலட்’ திட்டம்
நம்பகமான வட்டாரங்களின்படி, ஃபிளிப்கார்ட் தனது உணவு விநியோகச் சேவையை வரும் மே அல்லது ஜூன் மாதங்களில் பெங்களூருவில் முதற்கட்டமாகச் சோதிக்க உள்ளது.
குயிக் காமர்ஸ் (Quick Commerce): ஏற்கனவே ஃபிளிப்கார்ட் தனது ‘Flipkart Minutes’ மூலம் 10-15 நிமிடங்களில் மளிகைப் பொருட்களை விநியோகித்து வருகிறது. அதோடு உணவையும் இணைப்பது லாஜிஸ்டிக்ஸ் செலவைக் குறைக்கும்.
ONDC இணைப்பு: ஃபிளிப்கார்ட் தனது சேவையை அரசாங்கத்தின் ONDC (Open Network for Digital Commerce) மூலமாக வழங்கவும் ஆலோசித்து வருகிறது. இது மற்ற தளங்களை விட குறைந்த கமிஷனில் உணவை வழங்க உதவும்.
வாடிக்கையாளர்களுக்கு என்ன லாபம்?
போட்டி விலைகள்: ஃபிளிப்கார்ட் சந்தையில் நுழையும்போது, வாடிக்கையாளர்களைக் கவர ஆரம்ப காலங்களில் அதிக டிஸ்கவுண்ட்கள் மற்றும் ‘Flipkart SuperCoins’ சலுகைகளை வழங்க வாய்ப்புள்ளது.
ஒரே ஆப் : துணிமணி, மொபைல், மளிகை மற்றும் இப்போது உணவு என அனைத்தையும் ஒரே செயலியில் வாடிக்கையாளர்கள் பெற முடியும்.
சவால்கள் என்ன?
உணவு விநியோகம் என்பது லாப வரம்பு மிகக் குறைந்த ஒரு துறை. சொமாட்டோ மற்றும் ஸ்விக்கி போன்ற நிறுவனங்களே பல ஆண்டுகளுக்குப் பிறகுதான் லாபத்தைப் பார்க்கத் தொடங்கியுள்ளன. இந்நிலையில், ஃபிளிப்கார்ட் எந்த மாதிரியான உத்திகளைக் கையாண்டு லாபமீட்டும் என்பது பெரும் எதிர்பார்ப்பை உருவாக்கியுள்ளது.
