-KH News Desk
சென்னை: தமிழ்நாடு உணவு பாதுகாப்புத் துறையின் கீழ் இயங்கும் அனைத்து மாவட்ட நியமன அலுவலர்கள் மற்றும் உணவு பாதுகாப்பு அதிகாரிகளுடனான (Food Safety Officers) அவசர ஆய்வுக் கூட்டம் சென்னை தேனாம்பேட்டையில் நடைபெற்றது. இக்கூட்டத்திற்குப் பிறகு செய்தியாளர்களைச் சந்தித்த மாண்புமிகு அமைச்சர், பொதுமக்களின் ஆரோக்கியத்தை உறுதி செய்யும் வகையில் பல்வேறு முக்கிய முடிவுகள் எடுக்கப்பட்டுள்ளதாகத் தெரிவித்தார்.
அமைச்சர் செய்தியாளர்களிடம் பகிர்ந்து கொண்ட முக்கியத் தகவல்கள் பின்வருமாறு:
சுகாதாரமான தெருவோர உணவகங்கள் (Healthy & Hygienic Food Street): ஏழை, எளிய மக்கள் அதிகம் பயன்படுத்தும் தெருவோர உணவு விடுதிகளில் தரமான மற்றும் சுகாதாரமான உணவு கிடைப்பதை உறுதி செய்ய புதிய முன்னோடித் திட்டம் (Pilot Project) தொடங்கப்பட உள்ளது. முதற்கட்டமாக சென்னை, திருச்சி, மதுரை, சேலம், கோயம்புத்தூர் மற்றும் திருப்பூர் ஆகிய 6 மாவட்டங்களில் குறிப்பிட்ட தெருக்கள் தேர்வு செய்யப்பட்டு ‘மாதிரி தெருவோர உணவகப் பகுதிகளாக’ மாற்றப்படும். அங்குள்ள கடைகளைத் தரப்படுத்துவதோடு, சிறு வியாபாரிகளின் ஆரம்ப முதலீட்டிற்கு வங்கிக் கடன் உதவிகளும் வழங்க அரசு முடிவு செய்துள்ளது.
ஹோட்டல் ஊழியர்களுக்கு டைபாய்டு தடுப்பூசி: அசைவ உணவகங்கள், நட்சத்திர விடுதிகள் மற்றும் திருவிழாக் காலங்களில் மக்கள் அதிகம் கூடும் இடங்களில் உணவுப் பாதுகாப்பு விதிகள் தீவிரமாகப் பின்பற்றப்படும். உணவகங்களில் சமைப்பவர்கள் மற்றும் பரிமாறுபவர்கள் (Food Handlers) மூலம் தொற்றுநோய்கள் பரவாமல் தடுக்க, அவர்களுக்கு அரசாங்கம் சார்பிலேயே ‘டைபாய்டு தடுப்பூசி’ (Typhoid Vaccine) போடுவதற்கான திட்டங்கள் வகுக்கப்பட்டு வருகின்றன. இதுகுறித்த அதிகாரப்பூர்வ அறிவிப்பு விரைவில் வெளியாகும்.
ஊழலற்ற, வெளிப்படையான நிர்வாகம்: பொதுமக்களிடமிருந்தும் சில உணவக உரிமையாளர்களிடமிருந்தும் உணவு பாதுகாப்பு அதிகாரிகள் மீது வரும் புகார்களை அரசு கவனித்து வருகிறது. அதிகாரிகள் யாரையும் தேவையின்றி துன்புறுத்தக் கூடாது (Harassment) என்றும், மாண்புமிகு முதலமைச்சரின் வழிகாட்டுதலின்படி நேர்மையான, வெளிப்படையான மற்றும் ஊழலற்ற முறையில் சட்டப்படியான கடமைகளைச் செய்ய வேண்டும் என்றும் அதிகாரிகளுக்குக் கடுமையான அறிவுறுத்தல்கள் வழங்கப்பட்டுள்ளன.
ஆய்வுகளும் ‘ஃபுட் ரிவியூ யூடியூபர்களும்’: பெரிய மற்றும் நட்சத்திர உணவகங்களில் ஆய்வுகள் நடத்தப்படுவதில்லை என்ற குற்றச்சாட்டை மறுத்த அமைச்சர், மாதந்தோறும் குறிப்பிட்ட எண்ணிக்கையில் ஆய்வுகள் தொடர்ந்து நடைபெற்று வருவதாகவும், ஆய்வு செய்யும்போது ஊடகங்களை உடன் அழைத்துச் செல்லக் கூடாது என்ற விதிமுறை இருப்பதால் அது வெளியில் தெரிவதில்லை என்றும் விளக்கமளித்தார்.
மேலும், யூடியூபில் உணவு விமர்சனம் (Food Review) செய்பவர்கள் குறித்துப் பேசிய அமைச்சர், “சில ஃபுட் ரிவியூவர்கள் மிகவும் நேர்மையாகச் செய்கிறார்கள். ஆனால், சிலர் சுய லாபங்களுக்காகச் சுகாதாரமற்ற கடைகளையும் கூட மிகச்சிறந்த கடை எனத் தவறான விமர்சனங்களை வழங்குகின்றனர். அத்தகைய யூடியூபர்கள் மீது சட்டப்படி என்ன நடவடிக்கை எடுக்கலாம் என்பது குறித்து அரசு ஆலோசித்து வருகிறது” என்றார்.
மாதாந்திர ஆய்வறிக்கைகள் மற்றும் அதில் எடுக்கப்பட்ட நடவடிக்கைகள் குறித்த விவரங்கள் இனி பொதுமக்களின் பார்வைக்குத் தொடர்ந்து வெளியிடுவதற்கான ஏற்பாடுகளும் செய்யப்பட்டுள்ளதாக அமைச்சர் தனது பேட்டியில் சுட்டிக்காட்டினார்.
