இந்தியாவின் முன்னணி நிறுவனமான ரிலையன்ஸ் இண்டஸ்ட்ரீஸ் குழுமத்தின் நுகர்வோர் பொருட்கள் பிரிவான ரிலையன்ஸ் கன்ஸ்யூமர் புரோடக்ட்ஸ் (RCPL), தமிழகத்தைச் சேர்ந்த புகழ்பெற்ற சதர்ன் ஹெல்த் புட்ஸ் (Southern Health Foods) நிறுவனத்தைக் கைப்பற்றியுள்ளது. இந்த நிறுவனம் ‘மன்னா’ (Manna) என்ற பெயரில் ஆரோக்கிய உணவுப் பொருட்களைத் தயாரித்து வருவது குறிப்பிடத்தக்கது.
உதயம், இண்டிபெண்டன்ஸ் வரிசையில் மன்னா:
ரிலையன்ஸ் நிறுவனத்தின் வசம் ஏற்கனவே உதயம் (Udhaiyam), இண்டிபெண்டன்ஸ் (Independence) மற்றும் SiL போன்ற பிராண்டுகள் உள்ளன. இப்போது ‘மன்னா’ பிராண்டையும் இணைத்திருப்பதன் மூலம், வேகமாக வளர்ந்து வரும் சிறுதானியங்கள் மற்றும் ஆரோக்கிய உணவுப் பொருட்கள் சந்தையில் ரிலையன்ஸ் தனது பிடியை வலுப்படுத்தியுள்ளது.
20 ஆண்டுகால நம்பிக்கை
கடந்த இரண்டு தசாப்தங்களுக்கும் மேலாக, தமிழ்நாடு மற்றும் அண்டை மாநிலங்களில் ஆரோக்கிய உணவுகளுக்கான முன்னணி பிராண்டாக ‘மன்னா’ திகழ்கிறது. குறிப்பாக சிறுதானிய மாவுகள், குழந்தைகளுக்கான ஊட்டச்சத்து உணவுகள், ஓட்ஸ் மற்றும் உலர் பழங்கள் போன்ற பிரிவுகளில் மன்னா மக்கள் மத்தியில் மிகுந்த நம்பிக்கையைப் பெற்றுள்ளது.
நிர்வாகத்தின் கருத்து
இந்த ஒப்பந்தம் குறித்து ரிலையன்ஸ் கன்ஸ்யூமர் புரோடக்ட்ஸ் இயக்குனர் டி. கிருஷ்ணகுமார் கூறுகையில்:
“தமிழகத்தின் மிகவும் நம்பகமான பிராண்டுகளில் ஒன்றான மன்னா, ஆரோக்கியம் மற்றும் சத்துணவுப் பிரிவில் ரிலையன்ஸை மேலும் வலுப்படுத்தும். எங்களது விநியோகச் சங்கிலி (Supply-chain) மற்றும் ஆராய்ச்சி மேம்பாட்டுத் திறனைப் பயன்படுத்தி, தென்னிந்தியாவில் மட்டுமே பிரபலமாக உள்ள ‘மன்னா’வை இந்தியா முழுவதும் கொண்டு செல்வதே எங்கள் நோக்கம்” எனத் தெரிவித்தார்.
மக்களின் உணவுப் பழக்கம் ஆரோக்கியத்தை நோக்கி மாறி வரும் நிலையில், தரமான சத்துணவுப் பொருட்களை மலிவு விலையில் இந்தியா முழுவதும் கொண்டு செல்ல இந்த கையகப்படுத்தல் உதவும் என்று ரிலையன்ஸ் நம்புகிறது.
