ச.ஷாலினி
Booking.com மற்றும் Statista இணைந்து நடத்திய ‘இந்தியா அக்கமடேஷன் பாரோமீட்டர்’ (India Accommodation Barometer) ஆய்வின்படி, 75% ஹோட்டல் உரிமையாளர்களுக்கு வரும் மாதங்களில் தொழில் வளர்ச்சி சூப்பராக இருக்கும் என்று கணித்துள்ளனர். இது கடந்த 2024-ம் ஆண்டின் 69% என்ற அளவை விட அதிகமாகும்.
டயர்-III (Tier-III) நகரங்களின் ஆதிக்கம்
இந்தியாவின் சிறிய நகரங்களான டயர்-3 நகரங்களில் ஹோட்டல் அறைகளுக்கான தேவை, தங்கும் வீதம் (Occupancy Rates) மற்றும் சராசரி தினசரி வருவாய் (ADR) ஆகியவை மிகச் சிறப்பாக உள்ளன. “இந்திய தங்குமிடத் துறை சவால்களை முன்கூட்டியே கணித்து புதுமைகளைப் புகுத்தி வருகிறது” என்று Booking.com தெற்காசிய பிராந்திய மேலாளர் சந்தோஷ் குமார் தெரிவித்துள்ளார்.
நிகழ்வு-சார் பயணங்கள் (Event-Driven Travel)
திருவிழாக்கள், விளையாட்டுப் போட்டிகள் மற்றும் கலாச்சார நிகழ்வுகள் ஹோட்டல் புக்கிங்குகளை அதிகரிக்கின்றன. 56% ஹோட்டல் உரிமையாளர்கள் இது போன்ற நிகழ்வுகளால் புக்கிங் அதிகரித்துள்ளதாகக் கூறியுள்ளனர்.
41% பேர் ஒரு அறைக்கான வருவாய் (Revenue per room) அதிகரித்துள்ளதாகத் தெரிவித்துள்ளனர். இதன் காரணமாக 49% ஹோட்டல்கள் நிகழ்ச்சி ஏற்பாட்டாளர்களுடனும், 45% ஹோட்டல்கள் சுற்றுலா வாரியங்களுடனும் இணைந்து செயல்படத் திட்டமிட்டுள்ளன.
முதலீடுகள் மற்றும் தொழில்நுட்பம்
சுமார் 48% ஹோட்டல் உரிமையாளர்கள் புதிய முதலீடுகளைச் செய்யத் திட்டமிட்டுள்ளனர். செயற்கை நுண்ணறிவு (AI) தொழில்நுட்பம் குறித்து ஆர்வம் இருந்தாலும், விலையை நிர்ணயித்தல் (39%) மற்றும் வீட்டு பராமரிப்புப் பணிகளில் (35%) பயன்படுத்துவதில் இன்னும் தயக்கம் நிலவுகிறது. அதிக முதலீடு மற்றும் தெளிவற்ற லாபம் (ROI) காரணமாக தொழில்நுட்ப மாற்றத்தில் ஹோட்டல்கள் கவனமாகச் செயல்படுகின்றன.
வேலைவாய்ப்பு மற்றும் திறன் மேம்பாடு
பெரிய நகரங்களில் ஹோட்டல்கள் தங்கள் குழுவை விரிவுபடுத்துவதால் வேலைவாய்ப்புகள் பெருகுகின்றன. இருப்பினும், சரியான திறமையாளர்களைக் கண்டறிவதிலும் சம்பள அழுத்தத்திலும் சவால்கள் உள்ளன.
தியர்-3 நகரங்களில் 67% ஹோட்டல்கள் தகுதியான பணியாளர்கள் கிடைப்பதில் தட்டுப்பாடு நிலவுவதாகக் கருதுகின்றன. இதைச் சரிசெய்ய 41% ஹோட்டல்கள் பணியாளர் பயிற்சி பட்ஜெட்டை (Training budget) அதிகரித்துள்ளன.
ஒட்டுமொத்தமாக, இந்திய ஹோட்டல் துறை சவால்களைத் தாண்டி, புதுமையான உத்திகள் மூலம் வளர்ச்சியை நோக்கி நகர்ந்து வருகிறது.
